ALKONTRA SA KAMANG
Kon nakasuway na sa Grooveshark, nga akong nahisgutan dinhi pila na ka semana ang nilabay, nalingaw na tingali pag-ayo ka sa pagpaminaw sa mga awit sa kinaham nga mag-aawit o banda. Lahi sa Pandora ug Lastfm, sa Grooveshark ikay magbuot (1) unsang kantaha ni kinsang mag-aawit ang paminawon; (2) unsang mga kantaha ang mosunod; (3) kon ang tibuok album bay patokaron; o (4) kon isunod ang tanang awit mag-aawit o banda (hangtod sa 200 ka awit).
Apan dunay problema. Bug-at kaayong Grooveshark. Kon mokamang ang internet connection, magsige og putulputol. Di gyod diay matuman ang tanang gusto kon libre ang teknolohiya.
-o0o-
Mas gaan ang Imeem. Di hingpit ang imong pagkontrolar sama sa Grooveshark. Apan mas maayo gihapon kay sa Pandora ug Lastfm nga ulug-ulogan lang ka nga mangita sila og susamang mga awit. Nga kasagaran mosangpot sa pagpatokar sa mga awit nga wa mailhi sa mga mag-aawit nga labaw pang hanap.
Sama sa Grooveshark, makapili sab ka pagpatokar sa tibuok album sa Imeem. Apan di sama kadaghan ang ilang imbentaryo. Mabawi hinuon ni sa kasayon sa pagpatokar sa inandam na nga playlist. Pagbutang nakog "Beatles" sa ilang search box, gipakita dayon ang 7,740 ka mga awit, pelikula ug mga hulagway sa Beatles. Pagtuplok nako sa "Music Playlist" tokar dayon ang playlist nga may 499 ka mga awit sa Beatles.
-o0o-
Bisan mas gaan, moungot gihapon ang Imeem kon hinay ang internet connection. Nga moigo ni bisan kinsa, bisan asang dapita, ug bisan unsa pay imong internet service provider (ISP). Kay di pa andam ang mga teknolohiya sa gidak-on sa multi-media files nga maoy nibaha sa internet karon.
Sa nangaging katuigan, kutob ra ta sa pag-email ug pagsudlay sa nagkalainlaing websites. Karon makahimo na ta pagtan-aw sa tibuok pelikula ug TV series, o pagsalmot sa komplikadong gubat sa mga kalibotan, o pagpasiugda sa atong kaugalingong webcast (sama sa gihimo karon sa DYAB Abante Bisaya sa stickam.com/dyab1512).
-o0o-
Samtang di pang kapalambo ang ISPs sa internet connection, modangop ta sa labing paspas nga makapalihok sa applications bisan sa limitadong teknolohiya. Mao ni nakaaghat nako pagsuway sa Chrome, ang browser sa Google.
Labihang paspasa sa Chrome. Lupig ang Firefox sa Mozilla ug ang Internet Explorer sa Microsoft. Bisag dunganon ang daghang tabs sa nagkalainlaing applications (streaming ang usa, slideshow sa pikas, email sa lain, ug download sa ikaupat), di mokamang ang PC. Kon may tab nga matagak, di maangin ang uban. Kon tak-opan nang tab, mahawan ang tanang basura ug mogaan pagbalik ang PC. Kon mokamang na gyod sa kadaghan sa nagdagan nga applications, tultolan ka sa Chrome unsay labing bug-at ug labing way pus aron mahipos sa labing daling panahon. [30] leo_lastimosa@abs-cbn.com
No comments:
Post a Comment