Arangkada of Leo Lastimosa for September 9, 2008

            KOMISYON SA DENGUE

 

            Nagpaugat sa ilang sayop nga paagi pagbatok sa dengue ang mga opisyal sa Dakbayan sa Sugbo.  Bisan gitambagan na sila sa mga eksperto sa nasudnong buhatan sa DOH nga di epektibo ang fogging operation batok sa mga lamok nga nagda sa makamatay nga sakit, padayon gihapon silang nagpabuhot sa kemikal.

            Ang nangasakit nga mga tinun-an sa Zapatera Night High School mao intawoy labing uwahi nga naangin sa pagpamugos sa mga opisyal sa dakbayan.  Silay gipabayad sa makauuwawng kasaypanan sa mga politiko ug mga doktor sa dakbayan.  Kansang mga lakang morang nawad-an og bisan gamay na lang nga lama sa kabuot.  Bahala na kon unsay sangpotan ug maig-an sa ilang binuang.

-o0o-

            Kasaligang mga tinubdan sa City Hall ug sa City Health Department nipasabot nako nga dunay duha ka hinungdan nganong namugos sila sa fogging operation:

·        Masuko ang mga tawo kon kutob lang sila sa panilhig ug panlimpiyo sa palibot, nga maoy labing barato ug epektibong paagi pagpuo sa mga lamok nga may dengue, mas moabiba ang mga molupyo sa kabaranggayan kon may fogging operations kay may makita ug madungog silang makina nga mag-andar ug magpabuhot og baga nga aso; ug

·        Ang pagpangompra og mga silhig daot ra kaayo og komisyon, kon duna man, kon itandi sa mas tambok nga komisyon sa pagpangompra og minilyon ka pesos nga balor sa mga kemikal.

-o0o-

            Di na bag-o alang sa mga opisyal sa Dakbayan sa Sugbo ang kontrobersiya sa pagpamalit sa way kapuslanan nga mga kemikal batok sa dengue.  Pila ka tuig nang nilabay, nagkauyon sila paggahin og kuwarta pagkompra og aqua resigen, o kemikal nga water-based.  Apan ang gihatod mao ang lambdacyalotrine, ang ikaduhang labing makahilo nga kemikal sunod sa endrine.

            Gawas nga napahimutang sa kakuyaw ang mga molupyo tungod sa makahilong kemikal, gipasanginlan silang nakalapas sa lagda pagsubasta sa kagamhanan.  Tungod sa akong pagbisto sa transaksiyon, nihulga ang mga konsehal sa dakbayan pagkiha nakog libelo.  Apan sila hinuoy giimbestigar sa Visayas Ombudsman.

            Unsay nahitabo sa kaso?  Nakatag-an mo, gilawalawaan na lang kay giyak-an sa Ombudsman.

-o0o-

            Kinsa may utok sa pagsige og hulhog sa mga opisyal sa City Hall sa padayong pagpangompra sa makahilong kemikal?  Kinsa may nangumbinser sa mga opisyal sa dakbayan sa pagbungul-bungol sa tambag sa DOH nga ang fogging operation di makapatay sa mga lamok nga may dengue ug makadaot gani hinuon sa panglawas sa mga molupyo?  Kinsa may naa sa posisyon pagpugos sa mga doktor sa City Health pagsige og pangayo og kemikal?

            Igo ba lang gihapon silang nag-ulug-ulog sa katawhan aron ingnon nga may gihimo batok sa dengue?  O ang tambok nang komisyon sa padayon nga pagpangompra sa makahilo nga mga kemikal ang hinungdan sa ilang paugat?  [30]  leo_lastimosa@abs-cbn.com