Arangkada of Leo Lastimosa for October 12, 2008

                   TANLAG NI SOC

 

          Binayran lang nga sakop sa media ang di mangutana ni Talisay City Mayor Soc Fernandez sa mosunod:

·        Unsa man kang matanga sa pagka amahan nga nakapadako man og anak nga sama kabadlungon ni Joavan?

·        Kon wa kay nahimo pagbadlong sa bugtong nimong anak, unsa may garantiya nga mabaraw nimo ang mas daghan ug mas dagkong badlungon sa City Hall?

·        Kon napakyas ka sa imong katungdanan isip pangu sa imong pamilya nga dunay tulo ra ka sakop, unsaon man nimo pagpangamahan sa dakbayan nga may dul-an sa 200,000 ka mga molupyo?

-o0o-

          Sipsip ug maikugon rang mga sakop sa media ang magdumili pagpangutana ni Mayor Soc ning mosunod:

·        Giunsa man nimo pagpadako si Joavan nga bisan 26 anyos na magda pa man og armas nga duwaan?

·        Unsa man ang imong gitudlo ni Joavan nga inay sa iyang naandang gimbuhaton pagbitbit sa imong bibliya mga bala ug tooter na man sa shabu ang gida?

·        Unsa man ang nakita ni Joavan sa tinuod nimong mga binuhatan, kadtong mga butang nga imong gihimo samtang way nagtan-aw, nga mas nituo man siya sa iyang mga barkada kay nimo?

·        Pila bay imong suholan ug unsa may imong mga patigayon nga sa kadaghan sa inyong luhong mga sakyanan wa na may plaka ang uban?

-o0o-

          Pulpol ug talawan ra nga sakop sa media ang di makaangkon og kaisog pagpangutana ni Mayor Soc ning mosunod:

·        Kon tinuod nga gihatagan nimo og P10,000, scholarship ug trabaho ang labing uwahing nangangkon nga mga biktima ni Joavan, giunsa man nimo pag-areglo ang nangagi niyang mga biktima?

·        Kon tinuod nga wa nimo gamita ang imong gahom ug buhatan pagdupa ni Joavan, nganong wa man nimo siloti ang mga opisyal sa Talisay nga nipagamit sa pumpboat nga alang unta sa kampanya batok sa ilegal nga pangisda alang sa island hopping ni Joavan ug nganong gipatrabaho man hinuon nimo sa motor pool ang usa sa mga babaye nga iyang gipanguyaban?

-o0o-

          Binayran, pulpol ug puti rag kiting nga mga sakop sa media ang mopalabay sa kahigayonan pagpangutana ni Mayor Soc sa mosunod:

·        Di ba ka lainan nga manudlo sa mga pagtulon-an sa bibliya ngadto sa ubang mga tawo nga wa man ka tuohi sa imong kaugalingong anak?

·        Di ba ka pangilogan nga mosangyaw sa katawhan nga, "Ang kamatuoran maoy mopalingkawas nato," nga gihimo man nimong tanan pagluok sa kamatuoran sa mga binuhatan ni Joavan ug gipangasab-an pa ganing mga sakop sa media nga nakakita sa sidsid sa imong mga pangulipas?

·        Giduphan ba gihapon nimo si Joavan sa imong pakigsulti sa Ginoo?

·        Makatug ka pa bang maghayang?

• Hangtod kanus-a ang imong pagpakaaron ingnon?  [30]  leo_lastimosa@abs-cbn.com