Arangkada of Leo Lastimosa for October 21, 2008

            HINAGIBAN SA RECALL

 

            Di ko molupyo sa Dakbayan sa Talisay.  Bisan kon sa Talisay Malayan Academy ko nakatiwas sa high school.  Di ko rehistradong botante sa Talisay.  O sa bisan asang dakbayan.  Kataposan kong nakabotar sa CSCST Main Campus (CSAT pa niadto) isip botante sa Barangay San Roque sa Dakbayan sa Sugbo sa piniliay sa 1984.

            Mao nga di ko kapirma sa petisyon sa recall batok ni Talisay City Mayor Soc Fernandez.  Apan kon pangutan-on ko sa taga Talisay, ako silang ingnon nga mopaluyo ko sa kampanya sa recall ni Crisologo Saavedra.  Kay mao ra ni bugtong paagi aron mabadlong ang mayor pagamit sa iyang gahom ug buhatan pagdupa sa iyang anak.

-o0o-

            Lain untang paagi pagbadlong sa mayor mao ang pagbaraw niya pinaagi sa sibaw nga pagsaway sa mabuot nga mga molupyo sa Talisay.  Ug sa pagbisto sa media sa giingon nga pagamit sa iyang anak sa mga sakyanan ug ubang kahimanan sa kagamhanan apil nang kapolisan.  Apan ang mayor nga nabantog sa iyang mga wali pagpatigbabaw sa kamatuoran, gipasanginglan nga wa mopakita og bisan gamay na lang kaikog pagluok ini.

            Sa di pa mahugno ang mga Talisaynon ug magduda nga inutil sila, nga bisan sa ilang kadaghan wa diay silay mahimo pagbaraw sa 26 anyos nga way kukauwaw nga nagpasalipod sa influencia sa iyang ama-ama, ang recall petition maoy mopahinumdom nga sila ang tinuod nga Haring Lungsod.  Ug nga si Fernandez ila rang suluguon.

-o0o-

            Lain pa gyod untang paagi mao ang pagdangop sa Ombudsman.  Nga ubos sa balaod di na unta magkinahanglan og pormal nga reklamo aron pagsusi sa mga pasangil sa kalapasan sa balaod.  Apan ang kamahiligon sa Ombudsman pagyaka sa mga kaso nga gisang-at sa ilang buhatan, di makadasig sa nagpakabana untang mga Talisaynon.

            Laing babag:  Ang pangu sa Visayas Ombudsman, Pelagio Apostol, hangtod karon nagpaugat pagtago sa iyang statement of assets and liabilities.  Kon si Apostol mismo di ganahan nga motug-an pilay iyang kabtangan ug utang, unsa may iyang katungod pagpugos ni Fernandez pagtug-an sa tinuod?

-o0o-

            Mahimong di katigom si Saavedra sa gikinahanglan nga 20,000 ka pirma.  Salamat sa ka-kontrobersiyal sa uban niyang kawsa ug sa padayong pagwarawara ni Fernandez sa bibliya.  Bisan makakuha pa sa gikinahanglang mga pirma, mahimong wa nay pundo, o panahon, ang Comelec alang sa recall election.

            Apan pinaagi sa pagpirma sa recall petition, ang mga Talisaynon makapadangat og sipa nga mensahe nga di sila mahimong bugalbugalan lang.  Ug kon bisan sa binuhatan sa amahan ug anak padayon silang mangiyugpos, mirisi nila.  Ang mahinungdanon mao nga makaamgo ang katawhan nga duna silay gahom ug gidaghanon pagpitol, pagpangayog kuwentada, o pagpalagpot gyod bisan sa labing dagkong mga opisyal sa kagamhanan.  [30]  leo_lastimosa@abs-cbn.com