Arangkada of Leo Lastimosa for October 14, 2008

            GATASAN UG DAKDAKANAN

 

            Ang paghusay sa ulohang buhatan sa LTFRB sa mga petisyon pagpaus-os sa plitehan nakapabuhi sa paglaom sa mga pasahero.  Nga di sila mapasagdan nga maglaway lang sa kaayuhan sa padayon nga pagtidlom sa presyo sa lana.  Bisan kon ang pagkanaog sa presyo sa lana sa nasud di sama kapaspas ni kadako sa pagtibugsok sa presyo sa lana sa merkado sa kalibotan, di angayng pasagdan lang ang mga pasahero nga maghinan-aw lang gikan sa suok.

            Makiangayon lang nga sublion ang plitehan.  Kay kon unsa kapaspas nga makapasa ang mga kompaniya sa lana ug ang kagamhanan ngadto sa mga pasahero sa bisan unsang pagsaka sa presyo sa lana, ingon sab sila kahinay nga makigsawo sa kinabag-an sa katawhan kon moubos ang presyo.

-o0o-

            Ang kaayuhan sa paglaslas sa plitehan di kutob lang sa mga pasahero.  Mao sab ni yawe aron nga matakdan sa mas ubos nga presyo sa lana ang presyo sa nag-unang mga palaliton.  Kay ang tanang mga baligya gikan sa labing dagkong shopping malls sa kinapusoran sa mga dakbayan ngadto sa labing gagmay nga sarisari stores sa labing hilit nga barangay gisakay og mga sakyanan.  Busa ang ilang presyo gipatongan sa dakong gasto sa plitehan.

            Apan kon tinuod man ang pasidaan sa atong katiguwangan, nga gidasonan na sa mga makinaadmanon—nga ang pagsaka sa presyo morang lastiko nga kusog moinat apan di na mohiyos—ang mas ubos nga plitehan makatabang pagkuhit sa konsiyensiya sa mga magpapatigayon nga mohunong una makadiyot sa way kinutoban nga pagpaburot sa ilang ginansiya.

-o0o-

            Di hinuon angayng motukob ang transport groups sa paon sa kagamhanan ug mga kompaniya sa lana nga sabungon sila batok sa mga pasahero.  Di ang kabos nga mga pasahero ang kaaway sa mga drayber ug operators.  Kon dili ang mga politiko ug mga magpapatigayon nga nagkonsabo sa pagtiti sa kataposang duga sa ilang pagtukaw ug paningkamot.

            Angay silang maghiusa.  Kay silay labing nagbaguod sa makalilisang nga buhis nga gibunal sa kagamhanan sa matag litro sa tanang produkto sa lana.  Ang ila rang panaghiusa, di panag-unay, maoy makabugto sa pagpanlupig.

-o0o-

            Lain nga angay nilang kusganon nga batokan mao ang paghimong gatasan sa industriya sa transportasyon.  Bisan unsa na lang mga multa ang bayranan ang mahunahunaan sa kagamhanan aron pagdugang sa kalbaryo sa dugay nang nag-ilaid nga hut-ong.

            Usa sa labing makauuwaw mao ang pagpabayad sa mga drayber ug operators og filing fee sa di pa silang kapangolekta og bisan unsang usbaw sa plitehan.  Ang dul-an sa P500 nga bayranan sa matag sakyanan way klaro kon unsay gamitan.  Kay ang papel nga gipatikan sa taripa tag-P0.05 ra; ang paghusay sa mga petisyon ilang gimbuhaton; ug ang pagsaka sa presyo sa lana nga maoy gipasikaran sa mga petisyon di atraso sa transport groups.  [30]  leo_lastimosa@abs-cbn.com